Shefi i Grupit Parlamentar të PDK-së, Abelard Tahiri, ka deklaruar se nevojitet themelimi i Komisionit Hetimor për zbardhjen e rastit të humbjes së mostrave të Astrit Deharit në IML dhe llogaritjen e borxheve të kompanive ambalazhuese të ujit.
Pas mbledhjes së Kryesisë, Tahiri ka theksuar se është e rëndësishme që të zbardhet çështja për humbjen e mostrave të Deharit në Institutin e Mjekësisë Ligjore dhe “skandali i llogaritjes së borxheve të kompanive ambalazhuese të ujit”.
“Ne vazhdojmë të ngulim që në seancat e radhës propozimi ynë për themelimin e Komisionit Hetimor për zbardhjen e komplet kësaj ngjarjeje, për humbjen e mostrave, pastaj gjetjen e tyre, pra duhet të hedhet dritë dhe të thirrën gjitha ata akter të cilët janë pjesë e IML-së që të japin versionin e tyre se si ka ardhur deri te kjo situatës që fillimisht të humbin mostrat ku qëndruan ato për një vit e gjysmë, dhe pastaj të kthehen sërish në Institutin e Mjekësisë Ligjore”, ka deklaruar ai.
Nuk do të heqim dorë në asnjë rrethana nga themelimi i këtij Komisioni, sepse është mirë që qytetarët ta dinë të vërtetën për humbjen e këtyre mostrave për një vdekje të dyshimtë ka ngjallë shumë debat, protesta dhunë e kështu me radhë. Ndërsa, sot ata që është dashur të bënin më së shumti po fshehën, dhe ata me gjasë kanë edhe dorë në humbjen dhe më pas edhe kthimin e tyre. E për këtë, ky Komision Hetimor do t’i zbardhë shumë çështje që kanë ndodhur gjatë kësaj periudhe”, ka thënë tutje ai.
Ai ka thënë se kjo nuk mund të trajtohet me një seancë të jashtëzakonshme apo debat parlamentar, por ka nevojë për një hetim të hollësishëm nga një Komision Hetimor.
“Javën e kaluar jemi njoftuar për një skandal të madh, pra për llogaritjen e borxheve të kompanive ambalazhuese të ujit, kjo nuk është një çështje që mund të trajtohet me një seancë të jashtëzakonshëm apo me ministrin në një debat parlamentar. Kjo çështje duhet të trajtohet me një Komision Hetimor”, ka thënë Tahiri i PDK-së.
Po ashtu, Tahiri ka bërë thirrje për intervistimin e deputetëve në kuadër të hetimit parlamentar për të trajtuar këto çështje të ndërlikuara që kanë prekur opinionin publik në Kosovë.
