UEFA ka ndëshkuar Rumaninë dhe Kosovën pas ngjarjeve të ndeshjes në Bukuresht, por çështja është larg përfundimit, pasi pritet të kalojë në Gjykatën e Arbitrazhit Sportiv (CAS) për një vendim përfundimtar. Nga njëra anë, Kosova ka kundërshtuar vendimin për humbjen 3-0 në tavolinë pas largimit nga fusha, ndërsa nga ana tjetër, Suedia ka reaguar ashpër ndaj këtij epilogu. Skandinavët, të prekur nga fakti që Rumunisë iu njoh fitorja në tavolinë, janë shqetësuar për efektet që kjo mund të ketë në renditjen e Ligës së Kombeve dhe mundësinë për t’u kualifikuar në play-off për Kupën e Botës 2026.
Në këtë situatë është përfshirë edhe një palë e tretë, Suedia, e cila po ndjek me vëmendje zhvillimet. Vendimi i UEFA-s ka ndikuar drejtpërdrejt në renditjen e skuadrave në Ligën e Kombeve, duke e vendosur Rumaninë mbi Suedinë në tabelën e përgjithshme të divizionit C. Ky ndryshim mund të ndikojë në shanset e Suedisë për të siguruar një vend në fazën e “play-off”-it për Kupën e Botës 2026.
Menaxheri i ekipit kombëtar të Suedisë, ish-futbollisti Kim Källström, ka shprehur shqetësimin e tij për ndikimin e vendimit në aspektin sportiv:
“Vendimi i UEFA-s është negativ për ne, megjithëse prek kryesisht ekipet e përfshira. Po hetojmë nëse ka ndonjë ndikim shtesë mbi renditjen tonë. Është për të ardhur keq që faktorë jashtë fushës ndikojnë në rezultatet sportive.”
Källström theksoi se çdo kombëtare duhet të fitojë vendin e saj në botëror përmes lojës në fushë dhe jo përmes rrethanave të jashtme, duke nënkuptuar se Suedia nuk ka frikë nga garat kualifikuese, por kërkon drejtësi dhe transparencë në proces.
Federatat e Kosovës dhe Suedisë pritet të ndjekin këtë çështje deri në fund në CAS, ku do të kërkojnë të rishikohet vendimi i UEFA-s për të dhënë fitoren Rumanisë. Në ndërkohë, ky rast po tërheq vëmendjen e komunitetit ndërkombëtar të futbollit, duke nxjerrë në pah kompleksitetin e vendimeve që ndikojnë në rezultatet sportive dhe në proceset kualifikuese.
