Ish-ministri i Shëndetësisë, Ferid Agani, i cili është pjesë e Koalicionit “Lista për Familjen”, ka dhënë një prononcim për portalin “Presheva Jonë” duke sqaruar qëndrimin e tyre politik lidhur me bashkëpunimet e mundshme paszgjedhore. Agani ka theksuar se Koalicioni “Lista për Familjen” nuk do të hyjë në asnjë koalicion paszgjedhor me parti politike të cilat nuk e kanë paraparë ndryshimin e nevojshëm në Kodin Civil, duke evituar pjesën e ligjit ku lejohen martesat mes gjinive të njëjta.
“Për ne është e papranueshme të bashkëpunojmë me forca politike që nuk e kanë në agjendën e tyre ndryshimin e Kodit Civil, sidomos për të shmangur legalizimin e martesave mes gjinive të njëjta. Kjo është një vijë e kuqe për koalicionin tonë”, ka deklaruar Agani.
Përveç kësaj, Agani ka vënë theks të veçantë edhe në vazhdimin e reformave në Ministrinë e Shëndetësisë, të cilat, sipas tij, kanë mbetur të pandryshuara që nga koha kur ai mbante postin e ministrit. “Reformat në shëndetësi janë thelbësore për zhvillimin e sistemit tonë shëndetësor. Fatkeqësisht, ato kanë stagnuar dhe ne do të kërkojmë që të rikthehen në agjendën politike si prioritet”, u shpreh ai.
Ky qëndrim i Ferid Aganit dhe i Koalicionit “Lista për Familjen” tregon një linjë të qartë politike, duke theksuar ruajtjen e vlerave tradicionale dhe nevojën për reforma në sektorin e shëndetësisë.
